Embaixadór Brunei Darussalam iha Timor-Leste, Wan Hadfi Latif, hasoru malu ho Vise-Primeiru-Ministru (V-PM) no Ministru Koordenadór ba Asuntu Ekonómiku (MKAE), no Ministru Turismu e Ambiente (MTA), Francisco Kalbuadi Lay, iha Gabinete Farol, Dili, hodi konklui nia mandate diplomátika iha Timor-Leste.
Durante enkontru, Embaixadór Brunei Darussalam, destaka avansu importante sira ne’ebé alkansa tiha ona durante ninia mandatu, no hametin liutan relasaun bilaterál liuhusi vizita Liurai Brunei Darussalam, Majestade Sultan Haji Hassanal Bolkiah Mu’izzaddin Waddaulah foin lailais iha Timor-Leste.
Diplomata ne’e mós kontente tanba Timor-Leste sei halo adezaun ba ASEAN iha simeira rejionál ne’ebé sei hala’o iha fulan Outubru, tinan 2025 iha Kuala Lumpur, Malázia.
Iha okaziaun ne’e, Vise-Primeiru-Ministru (V-PM), Ministru Koordenadór ba Asuntu Ekonómiku (MAKE), Ministru Turizmu no Ambiente (MTA), Francisco Kalbuadi Lay, agradese ba Brunei Darussalam, liuhusi Liurai Brunei Darussalam, Majestade Sultan Haji Hassanal Bolkiah Mu’izzaddin Waddaulah, ne’ebé halo esforsu maka’as hodi apoia totál Timor-Leste nia adezaun ba bloku rejionál ASEAN.